Команданы қалай жасақтадық

Зауыт құрылысы жалғасып жатыр, ал бүгін біз команда құру тақырыбын тарқатамыз. Команда бір күнде емес, біртіндеп, сыннан өтіп, шындалып қалыптасады.

Бәрі неден басталды

Барлығы серіктесім Никитамен бірге Қазақстандағы rockets.coffee кофе қуырушылар командасының бір бөлігі болуды шешкен сәттен басталды.

Бастапқыда екеумізден басқа ешкім болған жоқ. Тауар жіберу, жүкқұжат рәсімдеу, клиенттермен байланыста болу, логистиканың барлығы біздің мойнымызда болды және бұл кез келген саладағы көптеген бизнеске таныс жағдай екені анық.

Менің HoReCa саласында 20 жылдық тәжірибем бар. Ал Никита — техникалық ғылымдар докторы, жүйелі ойлап, кез келген іске байыппен қарайды. Осы айырмашылығымыздың арқасында команданың бірінші нұсқасы пайда болды.

Команданың кеңеюі

Уақыт өте келе команда мен серіктестік саны арта бастады.

Біз Orda Juice жобасын бастағанда, командаға бар индустриясының нағыз аңызы деуге тұрарлық Александр Пушкарев қосылды. Diageo өкілі, HoReCa саласында 19 жыл тәжірибесі бар, бар әлемі мен нарықты терең түсінетін маман.

Кейін, 2025 жылы қазанда командаға тағы бір серіктес — Александр Леонов қосылды. Ірі халықаралық компанияда 18 жылдық тәжірибесі бар, басшы боп жұмыс істеген, MBA дәрежесі бар, жүйе құру және басқару саласында өте мықты сарапшы.

Осылайша команда ғана емес, тұтас жүйе қалыптаса бастады.

Ең қиын бағыт — сату бөлімі

Ең көп қате осы бөлімді құруда жіберілді.

Өзім жасаған негізгі түйін: HoReCa саласынан шыққан 10 адамның біреуі ғана сата алады. Өнімді жақсы түсінетіндер көп, ал оны сата алатындар өте аз.

Тағы бір түсінгенім: еркін жұмыс кестесі тәртіптің жоғалуына әкеп соқтырады.

Біз сату бөлімін бірнеше рет толық қайта құрдық. Ашығын айтсам, мықты болса да, әлі де бақылауды талап ететін бөлім. Әлі де жетілдіретін тұстар бар.

Егер осыны оқып, өзіңді мықты сатушы деп санасаң, маған жаз: askar.ermagambetov@ordajuiceco.com.

Жүйе құруда кімдер шешуші рөл атқарады

Уақыт өте келе қай рөлдердің шын мәнінде маңызды екені түсінікті бола бастайды:

• өнім / технология — дәм мен сапаға жауапты адам
• операциялық бағыт — жұмыс барысы, логистика, бақылау
• сауда — табыс пен өсім
• маркетинг — клиенттер ағыны мен өнімді таныту
• өндіріс — егер зауытыңыз болса, бұл бастапқы шарт

Осы рөлдерсіз тұтас жүйе құру мүмкін емес.

Қызметкерлерді қалай табамыз

Әртүрлі арналарды сынап көргеннен кейін мыналарға тоқталдық:

1. Threads. Нақты кім керектігі сипатталған жазба жариялаңыз — нәтижесінде ондаған үміткер пен ұсыныс келіп түседі.
2. HeadHunter. Зауытқа бос жұмыс орындарын жариялағанда, алғашқы тәулікте 253 өтінім түсті. Қазір үміткерлерді іріктеп, команда құрып жатырмыз.
3. Жеке таныс. Өндіріс үшін маңызды адамды іздеп емес, шынайы өмірде танысып таптық. Бұрын танысқан адаммен ойымыз бір жерден шыға келді.
4. Жұрттың сөзі мен әлеуметтік желілер. Бұл әлі де ең күшті арналардың бірі. Адамдар бізді басқа адамдардан естіп келеді.

Мықты маман табу қиын ба

Иә.

Адам табу оңай болғанымен, өз адамыңды табу әлдеқайда қиын.

Әсіресе жай ғана орындаушы емес, өнімді түсініп, жауапкершілікті өз мойнына алатын, жүйеге сүйеніп жұмыс істейтін адам іздеп жүрсеңіз.

Бірақ ондай адамдар жоқтың қасы емес. Жобаның идеясы мықты, бағыты түсінікті болса, сізді өздері-ақ тауып келеді.

Команда — қызметкерлер саны ғана емес. Бұл үнемі өзгеріп, жаңарып тұратын жүйе. Біз әлі де іздеу үстіндеміз және бұл — қалыпты жағдай.

Егер біздің жобамыз саған қызық болса, біздің Instagram желісіндегі парақшаға не менің поштама жаз: askar.ermagambetov@ordajuiceco.com. Мүмкін командамызда өзіңе бір орын тауып қаларсың.