Сұлулық салонын ашу

Сұлулық салонын міндетті түрде ЖК немесе ЖШС ретінде тіркеу керек. Салонды ашпас бұрын оның бағытын айқындау маңызды: шағын студия ма әлде кең ауқымды қызмет көрсететін орталық па. Салонның түріне қарай орын, жабдық және қызметкерлерге қойылатын талаптар өзгереді. Дұрыс ойластырылған тұжырымдама шығынды үнемдеп, табысқа жол ашады.

Салон түрлері

Сұлулық салондары әдетте бірнеше бағытқа бөлінеді:

• классикалық сұлулық салоны — шаштараз қызметтері, тырнақ күтімі мен депиляцияны біріктіреді
• моносалон — бір ғана бағытта жұмыс істейді, мысалы, барбершоп, маникюр, депиляция немесе визаж студиясы
• медициналық салон (косметология орталығы, эстетикалық медицина, пластикалық хирургия клиникасы) — лицензия талап етеді, ал мамандардың медициналық білімі болуы шарт
• франшиза — дайын бизнес үлгісін, оқыту мен қолдау ұсынады, бастапқы кезеңдегі тәуекелдерді азайтады, бірақ мұндай форматта кәсіп иесінің шешім қабылдау еркіндігі шектеулі болады

Салонның орналасуы

Орын мен аумақ көлемін таңдау

Сұлулық салонын тұрғын үйдің бірінші қабатында, сауда орталығында және басқа да адам көп жүретін орындарда ашуға ұсынылады. Салонға кіреберіс аула жақтан емес, тротуар немесе көше жақтан болғаны дұрыс. Сауда және бизнес орталықтарындағы орынды жалға алу ақысы жоғары, сондықтан алдын ала сол жердің бағытын байқап, сұлулық салонына қаншалықты лайық екенін анықтап алған жөн.

Аумақ көлемі салонның түріне байланысты өзгереді: шағын студияға 30–50 м² жеткілікті, орта салонға шамамен 80–120 м², ал кең орталыққа кемінде 150 м² керек. Ғимарат ыстық-суық сумен, желдеткішпен және қуаты жеткілікті электр жүйесімен жабдықталуы керек.

Егер бөлмені жеке меншікке алу мүмкіндік болса, бұл тәуекелдерді азайтып, кейін жиі көшу қажеттілігін болдырмайды. Ал жалға алу кезінде шарттың өзгеруі немесе ұзартылмай қалу қаупі бар екенін ескерген жөн.

Жөндеу және дизайн

Салон іші заманауи, жайлы әрі ыңғайлы болуы керек. Кеңістікті клиентке де, шеберге де қолайлы етіп ұйымдастырған дұрыс. Әрлеуде ұзаққа шыдайтын, ылғалға төзімді материалдарды қолданған жөн. Кең әрі ашық кеңістік жасаған жөн, тар өткелдерден аулақ болыңыз.

Бьюти-салада тәжірибесі бар дизайнер техникалық талаптарды ескере отырып, кеңістікті дұрыс бөлуге көмектеседі. Дегенмен жөндеуге көп қаржы жұмсау міндетті емес — бастысы сапалы жабдыққа көңіл бөлу.

Жоспарды алдын ала ойластырыңыз: кіреберісте — ресепшн, күту аймағы — жұмыс аймағынан бөлек, жуу орны мен маникюр үстелдері — электр мен құбыр жүйелеріне жақын, ал санитарлық торап бөлек жерде орналасқаны дұрыс. Бұл кеңістікті де, жұмысты да ыңғайлы етеді.

Ресми талаптар мен рұқсаттар

Сұлулық салоны санитарлық-эпидемиологиялық талаптарға толық сай болуы керек.

Жұмыс бастамас бұрын барлық қажетті рұқсат пен тексеруден өтіңіз: жергілікті әкімдіктен қызметке рұқсат алыңыз, санитарлық-эпидемиологиялық пен өрт бақылау қызметінің қорытындыларын рәсімдеңіз.

Жабдық

Сапалы жабдық салонның қызмет деңгейін айтарлықтай көтереді. Cондықтан бюджеттегі ең үлкен үлесті осы бағытқа бөлу керек. Алғашқы шығын шамамен 5 миллион теңгеден басталуы мүмкін.

Егер қаржы шектеулі болса, қолданылған жабдықты алуға болады. Бірақ оны аларда техникалық жағдайын, құжаттары мен кепілдігін мұқият тексерген дұрыс. Ал мүмкіндік болса, бірден жаңа жабдыққа инвестиция салған тиімді — ұзақ мерзімде өзін ақтайды.

Шығындарды азайту үшін бастапқыда тек негізгі құралдар жеткілікті: бірнеше кресло, айналар, фендер, шаш пен тырнақ күтіміне арналған құралдар. Шығыс материалдарының қорын шамадан тыс жасамаған жөн.

Қызметкерлер

Бьюти-индустрияда табыстың басты негізі — адамдар. Клиенттің сенімі мен тұрақтылығы көбіне шебердің кәсіби деңгейі мен қарым-қатынасына байланысты. Егер қызметкерлер ісіне немқұрайлы қараса, клиенттің пікіріне әдемі интерьер мен заманауи жабдық әсер етпейді.

Қызметкерлерді ұстап тұру үшін тиімді ынталандыру жүйесін енгізу маңызды. Көбіне мынадай үш тәсіл қолданылады:

• шебер әр қызметтен пайыз алады
• шеберге тұрақты жалақы мен қосымша пайыз төленеді
• шебер жұмыс орнын жалға алу үшін белгіленген төлем жасайды

Жұмысты бастамас бұрын барлық қызметкерлермен еңбек шарты жасалып, медициналық кітапшалары тексерілуі тиіс. Ал медициналық бағыттағы мамандарға (косметолог, аппараттық процедуралар маманы, инъекциялық қызмет көрсететіндер) арнайы білім туралы диплом қажет.

Қызметкерлермен жұмыс істеу туралы толық ақпаратты сілтеме арқылы оқуға болады.

Қаржы және болжамдар

Сұлулық салонының табысы оның форматына, деңгейіне және орналасқан жеріне тікелей байланысты. Жалпы алғанда, мынадай көрсеткіштерге сүйенуге болады:

• бастапқы салымдар: шағын салонға — 3–5 млн теңге, орта деңгейлі форматқа — 10 млн теңгеден жоғары
• айлық табыс: тұрақты клиенттері бар орта салон айына шамамен 2–3 млн теңге табыс әкеледі
• өзін-өзі ақтау мерзімі: орта есеппен 1,5–2 жыл

Сұлулық салонын әртүрлі форматта ашуға болады — шағын студиядан бастап премиум деңгейдегі орталыққа дейін. Кәсіптің табысы орынды дұрыс таңдауға, сапалы жабдық пен кәсіби командаға тікелей байланысты. Алдымен санитарлық және заң талаптарын сақтаңыз. Шеберлерді ынталандыру жүйесін ойластырып, қызмет сапасын бақылауға да көңіл бөліңіз. Нарықты зерттеп, бәсекелестерді талдап, өз тұжырымдамаңызды айқындаңыз. Нақты бизнес-жоспар табысқа тезірек жетуге көмектеседі.