Кәсіпкерге жеке бренд қалыптастыру

Кәсіпкердің жеке брендін көбі қате түсінеді. Жеке бренд десе, бірден күнделікті сторис түсіру, камера алдында сөйлеу әрі жеке өмірді жариялау ойға келеді. Шын мәнінде бизнес иесінің бренді блогерлікке ұрыну емес. Оның түпкі мәні — сенім. Нарық бизнестің артында кім тұрғанын, оның қалай ойлайтынын, неге сенетінін және неліктен оған қаржысын, командасын, серіктестік пен уақытын сеніп тапсыруға болатынын түсінуі керек.

Шағын және орта бизнесте жеке брендтің мәні өте жоғары. Компания үлкен жүйеге айналғанша, басшының аты-жөні корпоративтік брендтен де өтімді болады. Тұтынушы үшін өнімнің өзі ғана емес, оны ұсынған кәсіпке деген сенім де маңызды. Әсіресе қызмет көрсету, консалтинг, білім беру, өндіріс, қоғамдық тамақтану немесе бөлшек сауда саласында мұның әсері айқын. Клиент үшін бизнестің артында жауапты, сөзіне берік тұлғаның тұрғаны маңызды.

Блогер болу міндет емес

Көптеген кәсіпкерлер жеке брендті «бірден инфлюенсерге айналуым керек» деген қате түсінікпен жүргізе бастайды. Өз табиғатына жат дүниелерді түсіріп, біреудің форматын көшіреді, қаралым үшін жеке өмірін жария етіп, соңында тез қажып бітеді.

Нәтижесінде жеке бренд бизнесті өсіретін құрал емес, ығыр қылатын тағы бір ауыр міндетке айналады.

Нарықтағы сараптамалық із бен іскерлік абырой

Сауатты жеке бренд «не жарияласам екен» дегеннен емес, «нарықта қандай рөлде танылғым келеді» деген ұстанымнан басталады. Атап айтқанда:

• нарықтың жай-күйін талдайтын сарапшы
• бизнестің ішкі тынысы мен даму жолын көрсететін кәсіп иесі
• басқару тәжірибесі мен команда мәдениетін бөлісетін жетекші
• өнім сапасы мен жасалу барысын көрсететін өндіруші (мысалы)
• қаласындағы кәсіпкерлік ортаны жақсы білетін бизнес иесі

Барлық рөлді бірдей алып жүрудің қажеті жоқ.

Негізгі үш бағытты айқындау

Өзіңізге тән негізгі үш тақырыпты белгілеп алу маңызды. Мысалы:

• дайын тағам ұсынсаңыз — өнім сапасы, ашық маркетинг және әсірелеусіз шынайы бизнес
• салон иесі үшін — қызмет көрсету сапасы, команданы басқару және клиенттік тәжірибе
• B2B қызмет көрсету саласы үшін — кәсіби сараптама, нақты кейстер мен нарықтағы қателер

Жеке бренд тренд қуаламай, таңдалған бағыт пен өз ұстанымыңызды ұзақ уақыт бойы дәйекті түрде жеткізгенде ғана пәрменді болады.

Контентке негіз болатын іскерлік шешімдер

Жеке өмірді жария ету шарт емес. Басты назарды бизнестегі нақты шешімдер мен ішкі процестерге аударған әлдеқайда тиімді:

• жеткізушіден бас тарту себептері
• лайық қызметкерді таңдау қағидалары
• күрделі клиенттен кейін түйген нәтижелер
• жобаны іске қосу кезінде кеткен қателер
• баға саясатын өзгерту уәждері
• келіссөздерге дайындық барысы
• нарықтағы көңіл толмайтын тұстар
• ескірген тәсілдер

Мұндай контент жасанды емес, себебі ол шынайы жұмыс барысында туындайды.

Жеке брендтің үш діңгегі

Сауатты жеке бренд үш негізге сүйенеді: кәсіби сараптама, дербес ұстаным және адамгершілік сипат.

Кәсіби сараптама саладағы терең біліктілікті көрсетеді. Дербес ұстаным нарық құбылыстарына қатысты өзіндік көзқарасты білдіреді. Адамгершілік сипат бизнестің артында жай ғана алгоритм емес, тірі тұлға тұрғанын аңғартады.

Тек сараптамамен шектелу — контентті тым ресми етеді. Тек адамгершілік сипатты алға тарта беру — парақшаны жеке күнделікке айналдырады. Ал тек ұстанымға салмақ салу — бітпейтін дауға ұласады. Брендтің шынайы күші — тепе-теңдікті сақтай білу.

Бірінші қате — қолайлы сәтті күту

Ең жиі жіберілетін қателік — ыңғайлы сәтті тосу. Көбі «бизнес аяғынан тік тұрғанда бір-ақ бастаймын» деп ойлайды. Алайда жеке бренд бизнеспен қатар дамиды. Аудитория үшін тек соңғы нәтиже емес, соған жеткізген даму жолы да маңызды.

Әрине, компания ішіндегі бейберекетсіздікті, қаржылық қиындықтар мен ішкі келіспеушіліктерді сыртқа шығарудың қажеті жоқ. Дегенмен бизнестің қалыптасу барысын: оң өзгерістерді, түйген сабақтарды, қабылданған шешімдер мен негізгі ұстанымдарды көрсетіп отырған абзал.

Екінші қате — тым қарапайым болудан жасқану

«Жеткізушіні таңдау немесе клиентпен сөйлесу барысы ешкімге қызық болмас» деген жаңсақ ой болуы мүмкін. Керісінше, бұл өте қызық контент: нарық жасандылықтан әбден жалықты. Серіктестер мен тұтынушылар бизнестің шынайы болмысын, ішкі тынысын көргісі келеді.

Әсіресе арзан уәделер мен «миллионер болуды үйретемін» сияқты көпірме сөздерден аулақ болып, салмақты әрі байсалды сөйлейтін басшының сөзі әлдеқайда жоғары бағаланады.

Үшінші қате — жеке брендті ішкі сырды ақтарумен шатастыру

Жеке өмірдегі әрбір оқиға оқырмандарға контент ретінде ұсынылмауға тиіс. Кәсіпкердің жеке бренді оның өмірі туралы телехикаяға айналмауға тиіс. Оның басты мақсаты — бизнесті өсіру әрі іскерлік беделді нығайту.

Бұл орайда нақты іскерлік шекараларды белгілеп алған жөн: жарияланатын оқиғалар, іште қалатын жеке сырлар, қозғалмайтын тақырыптар мен қолдануға болмайтын сөздерді алдын ала айқындалуға тиіс.

Пайдалы кеңес

Алдымен мына бағыттарды саралап, қағазға жазып шығу жеткілікті:

• клиенттер, серіктестер немесе қызметкерлер тарапынан жиі қойылатын 10 сұрақ
• өз салаңызда жиі кездесетін 10 қате
• бизнесте шешім қабылдауға негіз болатын 10 басты қағида

Бұл — жеке брендке арналған дайын 30 тақырып. Контентті жоқ жерден ойлап табудың еш қажеті жоқ. Күнделікті жұмысыңыздың өзінде айтатын дүние көп.

Жеке брендтің түпкі мәні

Кәсіпкерге жеке бренд ең алдымен адамдардың сеніміне ие болу үшін қажет. Клиент сізбен алғашқы кездескенге дейін-ақ ұстанымыңыз бен логикаңызды түсініп, серіктесіңіз тәжірибеңізге көз жеткізіп, ал командаңыз кімнің соңынан еріп келе жатқанын сезінуге тиіс. Осылайша нарық сіздің аты-жөніңізді белгілі бір деңгейдегі сараптамалық ойлау жүйесімен байланыстыра бастайды.

Ең бастысы — жеке бренд сіздің ішкі болмысыңызға қайшы келмеуге тиіс. Ыңғайсыз формат үшін өзіңізді қинаудың қажеті жоқ. Видео түсіру ұнамаса, сапалы мәтін жазыңыз. Жеке өмірді көрсеткіңіз келмесе, іскерлік шешімдеріңізді бөлісіңіз. Күн сайын сторис жүргізу жалықтырса, аптасына бір рет салмақты жазба жариялаңыз. Басты мақсат — сан қуып, жиі контент жариялау емес, ойыңызды түсінікті әрі шынайы жеткізіп, аудиториямен байланыс үзбеу.